CHOGM වින්දනය සහ පොදුජන නිර්වින්දනය

CHOGM ලංකාවට පැමිණීමට ඇත්තේ ටික දිනකි. මුළු ලංකාවම CHOGM පිළිගැනීමට සැදී පැහැදී සිටිති. නෙලුම් පොකුණ, හම්බන්තොට, සිගිරිය වටා නිල් මානෙල් මල් දිලේ. මර්සිඩීස් බෙන්ස් වාහන මහේශාක්‍ය ලීලාවෙන් රට වටා යයි. 138, 122, 125, 154 බස් මාර්ග විටින් විට අවහිර වන දවස වැඩි ඈතක නොවේ. ලොකු, කුඩා, බාල මහලු, සැවොම CHOGM එනතුරු බලා සිටිති. ෆ්ලෑෂ්බැක් විරු සමරු ගී ගයති. අපි බලා සිටිමු. අලුත් බස් නැවතුම්, අලුත් පාරවල්, අලුත් නගර අලංකරණ ක්‍රමෝපාය අප ඇස් ඉදිරිපිට මැවෙමින් පවතී. ලංකාව සුරපුරයක් වනු ඇත. දන මිනිසුන්ට ඇත්තේ උදම් අනන්නට ය. සංගීත සංදර්ශන නරඹන්නට ය. ඉතුරු සියල්ල CHOGM විසින් අපට ඉටු කර දෙනු ඇත. දරුවාට පාසලක්, යහ පාලනයක්, ලස්සන රටක්, නිදහස් දිවයිනක්, අලුත් ශ්‍රී ලංකාවක් රැගෙන CHOGM ඉක්මනින් එනු ඇත. එතෙක් බලා සිටිමු.

කළ යුත්තේ කුමක් ද? ගැටලුව කළ යුත්තේ කුමක්ද නොව, කළ හැක්කේ කුමක් ද යන්නයි.
චාල්ස්, කැමරන්, සිං, පැකර්, ඉසුරු රැගෙන අප වෙත CHOGM මාවත දිගේ එනු ඇත. අපට ඇත්තේ බලා සිටීමට පමණි. සියල්ල ඔවුන් විසින් අපට ඉටු කර දෙනු ඇත. ඒ නිසා CHOGM කෙලෙස පැමිණ කුමක් කරාවිද යන්න පුරෝකථනය කරන්නට අප කලබල විය යුතු නැත. මන්ද සෑම මාධ්‍යයක් ම මේ වනවිට CHOGM එන්නට ඇති දින ගණන මහත් අභිරුචියෙන් ගණනය කරමින් සිටින හෙයිනි.
---------------------------------
CHOGM යනු කවුද?

ලංකාවට එන සියලු රාජ්‍ය නායකයින් කොළඹ හා ඒ අවට තරු පහේ හෝටලවල නවාතැන් ගනු ඇත. එහෙත් චාල්ස් කුමරු වෙනත් ස්ථානයක, වෙනත් රටාවකට, වෙනම නවාතැන් ගනු ඇත. එහෙත් ඔහුගේ පැමිණීම CHOGM වෙත මහත් ආඩම්බරයකි. මන්ද?

CHOGM අපි...
- කලක්‌ චාල්ස් නියෝජනය කරන අධිරාජ්‍යයේ සුවච කීකරු වහලුන් ව සිට ලේ වැගිරීමෙන් හෝ නොවැගිරිමෙන් නිදහස ලබා ගත්තවුන් හෙයිනි.

- වින්දිතයින් ගේ පාර්ශවයේ සියල්ලන්ම නැවත එකතු වී විඳවීම මහේශාක්‍ය ලෙස සමරන බැවිනි.

- එහි ප්‍රධානියා ලෙස නැවත අධිරාජ්‍යවදියාම පත්කරගෙන ඇති හෙයිනි.

- ඔහුගේ පැමිණීම සහ ඔහුගේ යටතේ CHOGM සැමරීම අපට අපේ අතීතයේ අඳුරු සෙවනැලි ආවර්ජනය කරන හෙයිනි.

- ඔහු ආවත් ඔහුගේම ක්‍රමයකට - ඔහුගේ කාලයේ දී මෙන්ම- CHOGM සඳහා සහභාගී වන හෙයිනි.
නැවත ඔහු හෝ ඔහුගේ කිරීටය සෙවනේ සිටීම අපට අපගේ අදීනත්වය? සිහි කරන බැවිනි.

                               එහෙයින් CHOGM අපි...අතිශය වාසනාවන්තයෝ වෙමු.....

ඒ නිසාම රටම මේ වනවිට CHOGM එනතෙක්‌ බලා සිටීම අපට මේ මොහොතේ පැන නගින සියලු භෞතික සහ අධ්‍යාත්මික ගැටලු මගහරවා ගැනීමට ප්‍රත්‍යක්ෂ විසඳුමකි.

එහෙත් සියල්ලට පරව මට එක් ආසාවක් ඇත...
එනම්.............
CHOGM එන දවසට....චාල්ස් ගේ මුහුණ බැලීමටය...ඔහු CHOGM පරපුර දෙස හෙලන අධිරාජ්‍යවාදී රාජකීය බැල්ම දැකීමට ය.

එහෙයින් මමත් ඔබත්, අපත් CHOGM එනතෙක්‌ බලා සිටිමු......

Off Side- පුරුෂ වෙස් ගත් ඉරාන ස්ත්‍රී හෘදසාක්ෂිය

ඔවුන් තරගය නැරඹුවේ නැත.එහෙත් උද්දාම වූහ. ඔවුන් කිසිවෙකුගේ අඩත්තේට්ටමකට ලක්වුයේ ද නැත. එහෙත් පීඩා වින්දහ. ඔවුන් පිරිමි වූයේ ද නැත. එහෙත් ගැහැණු ද නොවූහ.

අධිනිශ්චය වූ ඉරාන පුරුෂ ලිංගය හා එහි බලපරාක්‍රමය හමුවේ, ඔවුන් පෙනෙන නොපෙනන මානයේ සිට තරගය නැරඹුහ?.

පිරිමි....ඔවුන් ට තරඟය විස්තර කර දුන්හ....
ගැහැණු.....................?????????????
.................
අචින්ත්‍ය බණ්ඩාර

සංස්කෘතික ප්‍රේමවන්තයා සහ අසංස්කෘතික ආදරය............

ප්‍රේමය.....සංස්කෘතික මිනිසුන් අතර ඇතිවන සංස්කෘතික හෝ අසංස්කෘතික හුවමාරුව...

ජිවිතයේ විවිධ තලවලදී අපට හමුවෙන විවිධ අය...ජිවිතේ විවිධ තලවල රැඳෙනවා....සමහර අය ප්‍රේමය එක්ක...සමහර අය අවබෝධය එක්ක.....ජිවිතේ ගතවන මොහොතවල් අපි ඔවුන් එක්ක ගොඩනගා ගන්නවා.....සමහර විටදී සතුටෙන්..සමහර විටදී අසතුටෙන්.....අපිට ජිවිතේ අහුවෙන තැනක තියනව....අපි හැමෝටම එකම තැනකදී..එකම විදිහට ජිවිතේ අහු නොවෙන්න පුළුවන්..එක තමයි ජිවිතේ. මට තේරෙන විදිහට. අපි හැම දෙනාම උත්සාහ කරන්නේ මේ ගැලපීම සහ නොගැලපීම අතරේ ජිවිතේ හොයාගන්න...ඔය අතරේ අපිට හමුවෙන සමහර අය, අපෙන් ජිවිතේ මනින්න උතසහ කරනවා.සමහර විට අපේ මිනුම් දඬු වලින් සමහර විට ඔවුන්ගේ ඒවායෙන්. මේ ක්‍රියාවලිය හැමවිටම දුන්දර වෙන්නේ නෑ....සමහර විටකදී අසුන්දර වෙනව.

අපේ ජිවිත ඇතුලේ එක එක තලයනට අයත් අය ඉන්න පුළුවන්. සමහර අය ජිවිතේ කේන්ද්‍රයේ ඉඳං අපේ හිතුවිලි පරම්පරාව එක්ක ගනුදෙනු කරනවා.ඒවාට බලපෑම කරනවා.ඒවා එක්ක ඔට්ටු වෙනවා. සමහර අය පරිධියේ ඉඳගෙන අපේ ජිවිතේ භෞතිකය එක්ක විවිධ විදිහේ ගනුදෙනු කරනවා. විවාහය, ජීවිතය, අත්දැකීම්, සිහින, බලාපොරොත්තු, මේ වගේ නොයෙකුත් දේවල්. පරිධිය එක්ක කේන්ද්‍රය සමපාත වෙන තැන වගේම, සමපාත නොවන තැන් බොහොමයි.

කෙනෙකුගේ ජිවිතේ ඇතුලට එන අය තම ඉන්නේ කේන්ද්‍රයේද පරිධියේ ද කියන එක තේරුම ගන්න එක හරිම වැදගත්. ඒත් ඒක තේරුම ගන්න ඕනේ ඔහුට හෝ ඇයට ඕනේ විදිහට නෙමෙයි. ජිවිතේ හිමිකරුවාගේ විග්‍රහයට අනුව. මොකද ඔහු හෝ ඇය තරම් තමාව දන්නා වෙන කිසිවෙක් නැති නිසා. අපි ගොඩනගන සමහර උපකල්පන, විසඳුම්, තේරුම ගැනීම සහ පුරෝකථන අපට සාපේක්ෂව අතිශය සාධාරණ සහ නිවැරදි ඒවා වෙන්න පුළුවන්. ඒත් ඒවා හැමවිටම සාධාරණයි කියල තර්ක කරන ඒක අපි අනෙකාට කරන අසාධාරණයක් කියල මම හිතනවා. අනෙකාගේ ජීවිතය තුළ අනෙකාගේ හඬට ඇති ඉඩ අපේ මතවාද ඇතුළේ අහුරන ඒක ඔහුගේ හෝ ඇයගේ ආත්මයට කරන හානියක්. මොකද හැම කෙනෙකුටම තමන්ට අවංක කතාවක් සහ ඒ කතාවට අදාල හැඩයක් තියන නිසා.

ප්‍රේමය කියන්නෙත් එහෙම දෙයක්.අපි ප්‍රේමය තුළ හිමිකරගන්නා ඉඩ අවිශ්වාසයෙන් ප්‍රශ්න කිරීම තරම් ප්‍රේමයට කළ කැකි අවැඩක් නැහැ. ඔහුගේ හෝ ඇයගේ උපරිමයට ඉඩ දෙන්න. එය විශ්වාස කරන්න. එය සමඟ බැදෙන්න..ඔබ වෘත්තයේ කවර සිමාවේ හිටියත්.ඔබ ඉන්න තැන තීරණය කරන්නේ අනෙකා මිස ඔබ නොවේ.

සංස්කෘතික කියවීම තුළ ඔබ අනෙකාගේ භෞතිකය තුළ පරිධියේ සිටින වග පෙනුණ ද එය එසේ නොවන්නට පුළුවන්. මන්ද ඔබ ඔබ මිස අනෙකාගේ හිතුවිලි පරම්පරාවට මෙතෙක් ඉඩ දී නොමැති නිසා.ප්‍රේමය සැමවිටම සංස්කෘතික රාමුව තුළ මැනිය නොහැකියි, භෞතිකය තුළ ස්ථානගත කළ නොහැකියි, විශේෂයෙන්ම එය හැඟීමක් ලෙස ගත කල. ඒ නිසා සෑම සංස්කෘතික මිනිසෙක් තුලම සංස්කෘතික මෙන්ම අසංස්කෘතික ප්‍රේමවන්තයෙක් සිටිය හැකියි. යම්විටක ඔබ සංස්කෘතික ප්‍රේමය අසංස්කෘතික මනොභාවයෙන් ප්‍රශ්න කිරීම හෝ අසංස්කෘතික ප්‍රේමය භෞතික සංස්කෘතික මනෝභාව තුළ විග්‍රහ කිරීමට යාමෙන් ප්‍රේමවන්තයා සහ ප්‍රේමය යන ප්‍රස්තුත දෙකම එකවිටම අහිමි කරගනීවි.